lama-drama

waö r is nid findt foa lauta zuan
foari glei weida bis hoibduan

in obbatlau_n
sogt ma r a mau_n

so schnöö wia r a obrüüblizz
is lama xaust noch üümizz

i suix daunoch in niglschdoaf
und breims duat firan igl schoaf

owa s lama is nid duadt
in minihof is s aa schau_n fuadt

kampt kimi au_n
is s glei dafau_n

i suich es fiich daunoch in weidn
und kauns auf ua_nmoi nimma leidn

den lama foari gaunz schdua noch
mid foigaas iwa buaboch

daun schde r i umanaund in oslip
wo ri mid finga ned fro schnipp

i foa wo au_n in oggau
und schrei foa lauta schogg au

dawaö sausz fiich noch rust
de suicharei is a falust

in dunaskiachn
kaunis nau_n riachn

miad kimi bis binggafööd
und woas genau i bin kua_n hööd

es lama reind i hindtn nooch
so foari goa bis schdegasbooch

a in horitschon
do woari schon

wiari duadtn umanaunda schau
song d leid es fiich is in grodnau

i hoff daasi in schdoob
es lama wiida hob

in loaredto
woas ned do

des bleede fiich hiaz schreiz
gaunz laut duach hoib deutschgreiz

duat songma d leid in eisnschdood
do waa des dumme luada grood

am weech noch wuiggasbrodaschdoaf
siachi nia r an kodaschwoaf

in großheflei_n
wiads do ned sei_n

duat is des luada ned des lama
und weida geht des fiichadrama

ois nexdas bleaz in nigitisch
is heas nid waö grod i gwitsch

so dengi ma daun in großmutschn
des fiich is do a rechte drutschn

in bodgoria
do woari a  

den gaunzn weech dadis zruck fian
waunis findat in gukmian

do brauchaz lama nimma reina
i namaz gean ins audo eina

in siigroom
mechtis a nau_n hoom

owa waunis in kofidisch
nau_n oiwaö nid dawisch

mochi ma soan_g ums lamalem
ois lezdas woa des fiich in strem

hi_n und hea und ummanaud
reins fiich in gaunzn buan_glaund

grood is s weeg
aus wiisfleeg

leichd fressns in gaas oda hiam
am end goa schau_n d wiam

oda es groosd guid in wöödn
des lossat i a nid göödn

in drumlin_g
wiads do nid umlin_g

oda a panik hoom
in tschanigroom

wea woas liigz in schdinaaz
aum friedhof oisa baaz

aum eind dasaufz ma in da roob
befoaris wiida gfundtn hob

des fiich is do und daun glei duat
und kimi hii_n is wida fuat

find is aum eind goa bei da laafnitz
sochi heasd sei glei braaf sitz

duat is kua_n fiich drum geht mei foat
noch owa- und noch undtawoat

do sogdtma wea des fiich soi flizzn
iwan beag noch owaschizzn

wos reind des fiich so auf und oo
wauni des wissat wari froo

in grofnschochn
mechadti bause mochn

daun ziachima in loggnhaus
foa lauta hiz de soggn aus

und am hauptbloz fo spitzziggn
muisi ma di hosn fliggn

daun heari aus neihodis
das s lama recht marod is

i wia schwoch
in loggnboch

dawaö frisz lama rode rosn
ban oazdafa_rl fo owadrosn

i suich des fiich daun in neidoi
hiaz giwi auf und hup dreimoi

in radio schoiti ei_n in schleinin_g
do heari wos fon fiich den meinin_g

in bamgoadn
sois auf mi woadn

i saus duathi_n so schnöö ois geed
es fiich is fuadt so schauri bleed

i wüü nia zrugg und draa mi um
do songs es is in broadnbrun

duat heari daun aum weech noch bama
reind huam alua_n des bleede lama

i foa glei hi_n es schded in schdoi
zum gligg woas nid in edelschdoi

zfriidn frisd des fiich sein hei
noch dera wüdn reinarei
 

Aus dem Buch:
vo de fiicha und de ruam
123 dialektgedichte mit einem ausführlichen glossar
© Verlag Sisyphus, 2008